അല്ലാഹു, ശ്രീരാമന്‍, യേശു ക്രിസ്തു തുടങ്ങിയവയൊക്കെ ഒരേ ദൈവത്തിന്‍റെ വിവിധ നാമങ്ങളാണോ?

 ✍🏻ഇസ്ലാമും യുക്തിവാദവും.

സ്രഷ്ടാവായ ദൈവത്തെ സൂചിപ്പിക്കാനാണ് അറബിയില്‍ 'അല്ലാഹു' എന്ന പദം ഉപയോഗിക്കുന്നത്. സ്രഷ്ടാവിനെ മാത്രമേ ദൈവമായി പരിഗണിക്കാനും ആരാധിക്കാനും പാടുള്ള എന്നാണ് ഇസ്ലാം നിഷ്കര്‍ശിക്കുന്നത്.

ശ്രീരാമനും യേശു ക്രിസ്തുവും മുഹമ്മദ് നബിയുമെല്ലാം ദൈവത്തിന്‍റെ സൃഷ്ടികളും ഭൂമിയില്‍ മനുഷ്യരായി പിറന്നവരുമാണ്. സാധാരണ മനുഷ്യര്‍ക്കുള്ള പല പരിധികളും പരിമിതികളും ഇവര്‍ക്കെല്ലാം ഉണ്ടായിട്ടുമുണ്ട്. ആരാധനക്കര്‍ഹനായ സര്‍വ്വ രക്ഷിതാവായ ദൈവത്തെ ഭൂമിയില്‍ ജീവിച്ചു പോയ മനുഷ്യരുമായ സാമ്യപ്പെടുത്തുന്നതും അവരുടെ നാമം തന്നെ നല്‍കുകയും ചെയ്യുക എന്നത് യുക്തി രഹിതമാണ്.

അതു കൊണ്ട് ദൈവത്തെ സൂചിപ്പിക്കാന്‍ ഇവരുടെ നാമം ഉപയോഗിക്കുന്നതോ അഥവാ ഇവരെ ദൈവമായി കണക്കാക്കുന്നതോ ശരിയല്ല. അതു കൊണ്ട് തന്നെ ശ്രീരാമന്‍, ക്രിസ്തു എന്നീ നാമങ്ങള്‍ 'അല്ലാഹു' എന്ന ശബ്ദത്തിന് സമാനമായി പരിഗണിക്കാവുന്നതല്ല.

അതെ സമയം സര്‍വ്വശക്തനായ ഏക ദൈവത്തെ സൂചിപ്പിക്കാന്‍ ഹൈന്ദവ വേദ ഗ്രന്ഥങ്ങളില്‍ കാണാവുന്ന ഹിരണ്യ ഗര്‍ഭന്‍, പ്രജാപതി തുടങ്ങിയ നാമങ്ങളും, ബൈബിളില്‍ ഉപയോഗിച്ച യെഹോവ, എലോഹിം തുടങ്ങിയ പേരുകളും 'അല്ലാഹു' എന്ന നാമത്തിനു പകരമായി പരിഗണിക്കാം. കാരണം അവയെല്ലാം ഒരേ സത്തയെയാണ് സൂചിപ്പിക്കുന്നത്.